Natamani kuanzisha intelijensia yangu

(c) Mzee wa Kujitoa

KINACHOWASHANGAZA ni kipi enyi walimwengu? Natamani nianzishe intelijensia yangu ili haya mambo yanayowaumiza vichwa yafikie ukomo. Naapa ni intelijensia tu ndio inaweza kuwapa ufafanuzi wa haya mambo yanayowakereketa bila majibu au suluhisho mwafaka. Nasema ngoja tu siku Katiba mpya itakaporuhusu watu binafsi kuanzisha intelijensia zao zifanye kazi sambamba na zile za polisi ndipo mtajua namaanisha nini. Hizi intelijensia za polisi kila mara wakitutangazia si zinahusika na haya mambo ya vyama vya siasa? Zao mara nyingi tumesikia zikibashiri uwepo wa vurugu pindi maandamano yakifanyika au michakato kama hiyo. Huko mimi siko, niko kwenye hii intelijensia ninayoitamani kuanzisha. Mwanangu kama ningepewa ruhusa ningeanza kwa kuanzisha intelijensia ya kuchunguza madhara ya mikataba kabla haijatiwa sahihi. Mmenisoma hadi hapo au mnashangaa shangaa tu? Kama ile intelijensia ya polisi inavyoweza kubashiri kwa hakika kwamba watu wakitembea zaidi ya kilomita mbili pamoja kuna nafasi kubwa ya vurugu kutokea, hii ya kwangu itabashiri kwamba mikataba iliyoingiwa kimizengwe ina hatari kubwa ya kuliletea taifa hasara itakayolipwa hadi na vilembwe wetu. Huko simo mtoto wa mama miye. Intelijensia yangu isingehangaika sana na mambo ya kisiasa. Ingeanza kuwamulika hao watu wanaoitwa wawekezaji na kujua kama huko walikotoka wana walau baisekeli. Mnabisha nini? Hamkusikia kuna lijikampuni limevuna kwetu kama vile ni shamba la bibi wakati huko kwao tunaambiwa haimiliki hata bajaji? Mtashangaa sana na mtakasirika zaidi mkijua wajinga ndio waliwao. Intelijensia yangu nasema isingedili na maandamano wala mikutano. Waache waandamane hadi magoti yaume na wapayuke hadi makoo yawakauke. Hayo yasingenihusu. Kwangu mimi ningedili zaidi na kuangalia hao wanaokuja kuwekeza kwetu wana uaminifu kiasi gani na tunapata maslahi gani kuwekeza kwa watu hao. Hiyo ndio intelijensia ninayotamani niruhusiwe kuianzisha. Mimi kama ningekuwa na uwezo wa kuwa na intelijensia yangu ningejiingiza pia katika kuchunguza uozo uliofanyika ambao vyombo vingene vimeshindwa kuuweka hadharani. Mtu anaweza kuzoa bilioni arobaini kwa makaratasi ya kughushi halafu inteleijensia zetu bado hazijampata mtu huyo? Ina maana hizo hela zililipwa na nani? Yawezekana siku hizi kuna akaunti zisizo na signatoriz? Nauliza mniambie ninyi mlioshindwa kukamata waliokwapua mabilioni kwa jina la Kagoda, hizo hela zilichukuliwa na mizimu? Mimi simo tena simo kabisa. Hayo ya Musa, shuruti na ya Firauni muyaone. Mimi nikiangalia hili la kuvunja mkataba halafu unaambiwa ulipe kuliko ambavyo ungelipa kama mkataba ungemalizika nalo linahitaji intelijensia ya Mzee wa Kujitoa! Kwani si nasikia kitivo cha kwanza kuanzishwa pale mlimani ni kitivo cha Sheria? Kitivo cha sheria si kinapaswa kuzalisha wanasheria? Walikuwa wapi wakati wa uvunjaji wa mkataba na baadae wakati kashirika ketu kameburuzwa mahakamani? Nasema mimi Mzee wa Kujitoa ningekuwa Mzee wa Intelijensia ningeweza kuwashauri hawa jamaa au wasivunje mkataba au wakivunja ningeweza kubashiri matokeo ya kesi hivyo kuliokolea taifa fedha. Maadam hamnipi hiyo nafasi ya kuunda intelijensia kabila hiyo basi walau tunaomba huko polisi kuwepo pia na intelijensia ya kujua mambo anayotuletea hasara na hasira. Simo huko tena nasema simo kabisa. Najitoa mbio kwenye haya yote. Kama ningepata nafasi ningeanzisha kitengo kidogo cha intelijenisa kwa ajili ya kukishauri chama nambari wahedi. Hiki kitengo cha intelijensia kingemshauri mwenyekiti wa chama hicho kusoma alama za nyakati na kumchagua mtendaji anayeendana na nyakati. Kwa wakati huu unadhani chama hicho kilichopo ICU kina mtendaji anayeweza kupambana na changamoto zinazokikabili chama? Mie simo ila badala ya kunukuu vitabu vya dini asivyovifahamu maana yake, ingekuwa bora zaidi akatumia katiba ya chama chake kutetea hoja. Simo ila wanasema uzee ni dawa. Labda naye kapewa wadhifa huo ili awe dawa. Simo tena nakimbia mbio kwenye hili. Lakini nawaapia kuna intelijensia moja muhimu zaidi ambayo Mzee wa Kujitoa angependa kuianzisha. Hii ni intelijensia ya Mzee wa Kujitoa ya kuwaarifu watu kwamba kama tuatendekeza udini lazima tutakuja kugeuziana kibao hapa. Mnadhani ninyi mnapikia Mola chai hadi mcheze na imani za watu kwa maslahi ya kisiasa bila kupata adhabu? Bisheni lakini nawaambia kwa udini huu unaoletwa mchana kweupe, tusije tukashangaa mito ya damu ikianza kutiririka. Huu ni udini unaotumiwa na wale ambao wakiutumia kwa akili zao wanadhani watapata faida za kisiasa. Hapa ndipo wanapomkufuru Mungu! Wanatumia dini kisiasa? Wallahi nawaambia tumefika pabaya. Nikimbie kabla huo ubaya haujanikuta. Haya mambo tunayachezea kwa vile hatujawahi kuyashudia kwetu sio? Watu wa kawaida wala hawana shida ya udni, udini uko kwa wakubwa nakuapia. Kwetu mbona Ahmedi anamwoa Mariana na hakuna shida? Kwa watu wa kawaida mbona unakuja Jamal anacheza na kutaniana kamisa na Dominiki? Nasema huu udini huu unaletwa na watu walioshindwa kisiasa. Simo ila kwa nguvu ya pamoja tunaweza kuwazomea wanaoleta udini na kudumisha tunu yetu ya jadi ya amani na utulivu. Mimi simo ila tujifunze kwa waliopitia kwenye shida kama hizo wanatushangaa tunapochezea amani kwenye tundu la choo. Nasema tena huku lazima nijitoe mwanawani. Nasema kama ningekuwa na nafasi ya kuanzisha intelijensia yangu ningeanzisha pia ya kuwatangazia watu kwamba ukisajili wanafunzi wengi vyuo vikuu bila mipango thabiti lazima itatokea migomo. Aidha intelijensia yangu ingegundua kwamba usipowalipa wahadhiri na wasomi mishahara mizuri au watakimbilia nje ya nchi au wataacha taaluma zao na kuingia kufanya mabo yasiyo hasa yaani “si hasa.” Simo ila ndivyo ambavyo intelijensia yangu ingegundua. Isitoshe intelijensia yangu ingegundua kwamba ucheleweshaji wa mikopo au kushindwa kutoa mikopo kungeleta adha kubwa kwa wanafunzi na familia zao hivyo kwa taarifa hizo za kiintelijensia, mimi Mzee wa Kujitoa nisingesita kupiga marufuku ucheleweshaji wa mikopo au kuwanyima mikopo wanafunzi wenye sifa husika. Naapa tuunde katiba mpya.